Ibilayishe inkomo eyebiwe iveni ebibukeka sengathi ilayishe izinkuni
![](https://i0.wp.com/www.isambanenews.co.za/wp-content/uploads/2023/11/Screenshot_20231128_235804.jpg?fit=640%2C318&ssl=1)
Kubikwa ukuthi abasolwa batholakale bemboze inkomo eyebiwe ngezinkuni ngesikhathi abalimi behlaba umkhosi ngemoto esolisayo emgwaqeni uBoschpoort eBelfast, eMpumalanga ngeSonto.
Imoto yadonsa amehlo abalimi abavele babiza amaphoyisa. Ngesikhathi amaphoyisa efika, kusolwa ukuthi abasolwa abane babaleke endaweni yesigameko, umshayeli wabanjwa.
Umsolwa oboshiwe, uPhumlani Mice Nkosi, oneminyaka engu-23, uhlulekile ukuchaza ukuthi kungani inkomo ifihlwe. Uphinde wehluleka nokuveza ukuthi ngubani umnikazi wenkomo okuholele ekutheni aboshwe ngecala lokutholakala nempahla okusolakala ukuthi yebiwe. Uphenyo luveze ukuthi inkomo yebiwe kwelinye lamapulazi aseduze endaweni yaseBelfast.
UNkosi uvele eNkantolo yeMantshi yaseBelfast izolo, ugcinwe esitokisini icala lakhe lahlehliselwa uMsombuluko zingu-4 kuZibandlela 2023.
UKhomishana wesiFundazwe we-SAPS eMpumalanga uLieutenant General Semakaleng Daphney Manamela ukwamukele ukubambisana phakathi kwamalungu omphakathi namaphoyisa endaweni.
UJenene uphinde waxwayisa abalimi nemiphakathi yonkana ukuthi baqinise ezokuphepha njengoba izigebengu zikwazi ukuthatha ezihlangana nakho njengoba sekusondele amaholidi kaKhisimusi.
Umthombo: https://m.facebook.com/story.php?story_fbid=pfbid02djqkwd52CNTjHYewuUv9gQtds7ppPS9dW736Lo1zZRt4mTP4kY3yDt2KUegAKRbml&id=100063704275961